A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Thursday 27 August 2015

គ.ជ.ប នឹង​រៀបចំ​ការ​ចុះ​ឈ្មោះ​បោះ​ឆ្នោត​សាកល្បង​នៅ​ដើម​ខែ​វិច្ឆិកា


ដោយ យាង សុជាមេត្តា
2015-08-27 rfa

ទីស្ដីការ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប)
RFA

គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប) នឹង​រៀបចំ​ការ​ចុះ​ឈ្មោះ​បោះ​ឆ្នោត​សាកល្បង​ចាប់​ពី​ថ្ងៃ​ទី​១ ដល់​ថ្ងៃ​ទី​១៥ ខែ​វិច្ឆិកា ឆ្នាំ​២០១៥។ ការ​សម្រេច​របស់ គ.ជ.ប ដូច​នេះ ត្រូវ​បាន​ប្រកាស​ឲ្យ​ដឹង​នៅ​ក្នុង​សេចក្តី​ប្រកាស​ព័ត៌មាន​របស់​ខ្លួន បន្ទាប់​ពី​មាន​កិច្ច​ប្រជុំ​កាល​ពី​ថ្ងៃ​ទី​២៦ សីហា។

គណៈកម្មាធិការ​ជាតិ​រៀបចំ​ការ​បោះ​ឆ្នោត ប្រកាស​ថា ក្នុង​ការ​រៀបចំ​ការ​ចុះ​ឈ្មោះ​បោះ​ឆ្នោត​សាកល្បង​នេះ គ.ជ.ប សម្រេច​ជ្រើស​យក​ឃុំ-សង្កាត់​ចំនួន​២៥ នៅ​ក្នុង ២៥​រាជធានី-ខេត្ត​ទូទាំង​ប្រទេស សម្រាប់​ធ្វើ​ជា​កន្លែង​ចុះ​ឈ្មោះ​សាកល្បង។

អ្នក​នាំ​ពាក្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត លោក ហង្ស ពុទ្ធា ឲ្យ​ដឹង​បន្ថែម​នៅ​ថ្ងៃ​ទី​២៧ សីហា ថា គ.ជ.ប បាន​ជ្រើសរើស​ឃុំ-សង្កាត់​ចំនួន​២៥ នោះ​រួច​រាល់​ហើយ សម្រាប់​ធ្វើ​ការ​ចុះ​ឈ្មោះ​សាកល្បង ក្នុង​នោះ​ភូមិ​ចំនួន​៤៣ ត្រូវ​បាន​ជ្រើស​ចេញ​ពី​ឃុំ​ទាំង ២៥​នោះ។ លោក ហង្ស ពុទ្ធា ឲ្យ​ដឹង​ដែរ​ថា ក្នុង​ការ​ចុះ​ឈ្មោះ​សាកល្បង​នេះ គ.ជ.ប គ្រោង​ចំណាយ​ប្រមាណ ៧០​ម៉ឺន​ដុល្លារ ដែល​ជា​ថវិកា​របស់​រដ្ឋាភិបាល។

បើ​ទោះ​ជា​បញ្ហា​នយោបាយ​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ កំពុង​តែ​ឡើង​កម្ដៅ​ដាក់​គ្នា​ក្តី ប៉ុន្តែ លោក ហង្ស ពុទ្ធា មាន​ប្រសាសន៍​ថា បញ្ហា​នយោបាយ​នឹង​មិន​ធ្វើ​ឲ្យ​ប៉ះពាល់​ដល់​ដំណើរ​ការ​ការងារ​របស់ គ.ជ.ប នោះ​ទេ៖ «យើង​បាន​ប្ដេជ្ញា​រួម​គ្នា​ថា ទោះ​បី​កម្ដៅ​នយោបាយ​យ៉ាង​ណា​ក៏ដោយ យើង​រួម​គ្នា​ធ្វើ​ការ​ដើម្បី​ជា​ប្រយោជន៍ និង​ជា​គំរូ​បោះ​ឆ្នោត​មួយ​ដែល​មាន​ស្តង់ដារ អាច​ទទួល​យក​បាន​ដោយ​អ្នក​បោះ​ឆ្នោត និង​ស្ថាប័ន​ពាក់ព័ន្ធ ព្រោះ គ.ជ.ប ត្រូវ​បាន​ទទួល​ស្គាល់​ដោយ​ព្រះរាជក្រឹត្យ​ទៅ​ហើយ អ៊ីចឹង គ.ជ.ប មាន​តួនាទី​បំពេញ​ការងារ​របស់​ខ្លួន​ទៅ​តាម​ការ​ចាំបាច់ រៀបចំ​ការ​បោះ​ឆ្នោត​មួយ យ៉ាង​ហោច​ក៏​ល្អ​ប្រសើរ​ជាង​មុន​ដែរ»។



នៅ​ក្នុង​ការ​បោះ​ឆ្នោត​ជ្រើស​តាំង​តំណាង​រាស្ត្រ​ឆ្នាំ​២០១៣ ពលរដ្ឋ​ដែល​បាន​ចុះ​ឈ្មោះ​បោះ​ឆ្នោត​មាន​ចំនួន​សរុប​ជាង ៩​លាន ៦​សែន​នាក់ ក្នុង​នោះ​មាន​ពលរដ្ឋ​ប្រមាណ ៧០​ភាគរយ​ប៉ុណ្ណោះ​ដែល​បាន​ទៅ​បោះ​ឆ្នោត។

លោក ហង្ស ពុទ្ធា មាន​ប្រសាសន៍​ថា ការ​ចុះ​ឈ្មោះ​បោះ​ឆ្នោត​សាកល្បង គឺ​ធ្វើ​ឡើង​ដោយ​ប្រើប្រាស់​ប្រព័ន្ធ​កុំព្យូទ័រ​ទាំងអស់ ព្រម​ទាំង​ឧបករណ៍​ស្កេន (Scan) មេដៃ​ជាដើម។ លោក​ថា បើ​តំបន់​ណា​គ្មាន​ប្រព័ន្ធ​អគ្គិសនី​ចូល​ទៅ​ដល់ គ.ជ.ប ក៏​នឹង​ត្រៀម​ម៉ាស៊ីន​ភ្លើង​ផង​ដែរ។ លោក ហង្ស ពុទ្ធា អះអាង​ថា ការ​ចុះ​ឈ្មោះ​បោះ​ឆ្នោត​សាកល្បង នឹង​ផ្តល់​ឲ្យ គ.ជ.ប នូវ​បទពិសោធន៍​ខាង​ការងារ​បច្ចេកទេស​ពាក់ព័ន្ធ​ការ​ចុះ​ឈ្មោះ​បោះ​ឆ្នោត បទពិសោធន៍​ក្នុង​ការ​រៀបចំ​ទំនាក់ទំនង​ជាមួយ​អាជ្ញាធរ​មូលដ្ឋាន ក្នុង​ការងារ​រៀបចំ​ការ​បោះ​ឆ្នោត និង​បទពិសោធន៍​ជាមួយ​ពលរដ្ឋ​អ្នក​ចុះ​ឈ្មោះ​បោះ​ឆ្នោត ជាដើម។

លោក ហង្ស ពុទ្ធា ឲ្យ​ដឹង​ដែរ​ថា ការ​ចុះ​ឈ្មោះ​បោះ​ឆ្នោត​ផ្លូវ​ការ​ទូទាំង​ប្រទេស​សម្រាប់​ការ​បោះ​ឆ្នោត​ជ្រើស​រើស​ក្រុមប្រឹក្សា​ឃុំ-សង្កាត់ ឆ្នាំ​២០១៧ នឹង​ធ្វើ​ឡើង​ចាប់​ពី​ខែ​មីនា ដល់​ខែ​ឧសភា ឆ្នាំ​២០១៦។ លោក​ថា បញ្ជី​ឈ្មោះ​អ្នក​បោះ​ឆ្នោត​ថ្មី​ផ្លូវ​ការ អាច​នឹង​ធ្វើ​ចប់​សព្វគ្រប់​នៅ​ក្នុង​ខែ​សីហា ឆ្នាំ​២០១៦៕

No comments: