ខេត្តព្រះវិហារ ៖ ប្រជាពលរដ្ឋខ្មែរចំនួន៣នាក់បានស្លាប់ ដោយសារទាហានថៃបាញ់ រីឯ៣នាក់ទៀតបាត់ខ្លួន និងម្នាក់រត់រួច ខណៈពួកគេឡើងលើខ្នងភ្នំដងរែក លួចចូលដីសៀម រកកាប់ឈើគ្រញូង ។ហេតុការណ៍នេះ បានកើតឡើង កាលពីវេលាម៉ោង១១ព្រឹក ថ្ងៃទី១១ ខែមីនា ឆ្នាំ២០១៤នៅតាមចំណុចដំណាក់ផ្តៀក ឆ្លងកាត់តាមព្រលានស្រទំ លើខ្នងភ្នំដងរែក ស្ថិតក្នុងភូមិឈើទាលគង ឃុំជាំក្សាន្ត ស្រុកជាំក្សាន្ត ខេត្តព្រះវិហារ ខាងលិចច្រកទ្វារអានសេះ ដែលជាចំណុចឈរជើងការពារព្រំដែនរបស់វរសេនាតូចលេខ៤០៥ ។
បើតាមការរៀបរាប់ពីស្ត្រីម្នាក់ឈ្មោះ គន្ធា ជាអ្នកចំណាកស្រុក មកស្នាក់នៅភូមិឈើទាលគង ដែលរួមដំណើរជាមួយ និងជាអ្នករត់គេចខ្លួនផុតពីសេចក្តីស្លាប់បានឱ្យដឹងថាពួកគាត់បានឡើងខ្នងភ្នំដងរែកមានគ្នា៧នាក់ ក្នុងនោះប្រុស៥នាក់ និងស្រី២នាក់ ទៅកាប់ឈើគ្រញូងក្នុងទឹកដីថៃ ដោយឡើងតាមចំណុចដំណាក់ផ្តៀក ។ ទាហានថៃបានបាញ់សម្លាប់ក្រុមគាត់ចំនួន៣នាក់ និង៣នាក់ទៀតបាត់ខ្លួនដែលអាចរត់វង្វេង ដោយមិនដឹងជាទៅដល់កន្លែងណាទេ ចំណែកគាត់ក៏បានរត់គេចខ្លួនរួច ចូលទឹកដីកម្ពុជាវិញ ។ស្ត្រីឈ្មោះ គន្ធា បន្តទៀតថា ក្រោយពីទាហានសៀមបាញ់សម្លាប់ក្រុមរបស់គាត់៣នាក់ហើយ ទាហានសៀមក៏បានដុតសពឱ្យឆេះខ្មៅរោលនៅនឹងកន្លែងតែម្តង ។
តាមមន្ត្រីសមត្ថកិច្ចនៅតំបន់នោះឱ្យដឹងថា ប្រជាពលរដ្ឋខ្មែរ៣នាក់ដែលស្លាប់នោះមាន ១-ឈ្មោះ ទិន ទី ភេទប្រុស អាយុ២៥ឆ្នាំ រស់នៅខេត្តកំពត ២-ឈ្មោះ អ៊ន ជីង ភេទស្រី អាយុ៥០ឆ្នាំ រស់នៅភូមិឈើទាលគង ឃុំជាំក្សាន្ត ស្រុកជាំក្សាន្ត និង៣-ឈ្មោះ ម៉ៅ ម៉ន អាយុ២១ឆ្នាំ រស់នៅខេត្តកំពត ។ ឯអ្នកបាត់ខ្លួន៣នាក់មិនស្គាល់អត្តសញ្ញាណទេ ប៉ុន្តែស្ត្រីម្នាក់ឈ្មោះ គន្ធា បានរត់គេចខ្លួនរួចមកដល់ទឹកដីកម្ពុជាវិញហើយ ។
ប្រភពពី Free Press Magazine
Read more: http://www.cambodiapage.info/?p=19405#ixzz2vvxMIyCT
No comments:
Post a Comment